School Holidays : జూన్ సగం వేసవి సెలవులే.. మిగతా రోజుల్లో వచ్చే హాలిడేస్ ఇవే

Holidays : తెలుగు రాష్ట్రాల్లో ప్రస్తుతం వేసవి సెలవులు కొనసాగుతున్నాయి. ఏప్రిల్ 24న ప్రారంభమైన సెలవులు మే మొత్తం కొనసాగి జూన్ 11న ముగియనున్నాయి. జూన్ 12న ఆంధ్ర ప్రదేశ్, తెలంగాణలోని అన్ని ప్రభుత్వ, ఎయిడెడ్, ప్రైవేట్ విద్యాసంస్థలు పున:ప్రారంభం కానున్నాయి. అంటే మరో పదిహేను ఇరవై రోజుల్లో విద్యార్థులంతా స్కూల్ బాట పడతారు. నెల నెలన్నర రోజులు హాయిగా వేసవి సెలవులను ఎంజాయ్ చేసిన విద్యార్థులు ఒక్కసారిగా స్కూల్ కి వెళ్లాలంటే బారంగా భావిస్తారు.

అయితే విద్యార్థులకు జూన్ లో సగంరోజులు వేసవి సెలవులతోనే ముగుస్తాయి. మిగతా రోజుల్లో ఆదివారాలు, రెండో శనివారం, కొన్ని ఆప్షనల్ హాలిడేస్ ఉన్నాయి. ఇలా ఐదారు రోజులు విద్యాసంస్థలకు సెలవులు వస్తున్నాయి. కాబట్టి జూన్ లో వేసవి సెలవులు ముగిసాక స్కూల్ కి వెళ్ళడానికి బాధపడే విద్యార్థులకు ఈ సెలవులు కాస్త ఊరట ఇస్తాయి.

ఆంధ్ర ప్రదేశ్, తెలంగాణలోని విద్యాసంస్థలన్ని జూన్ 12న తిరిగి ప్రారంభం కానున్నాయి. అయితే జూన్ నెల ప్రారంభంనుండే జూనియర్ కాలేజీలు తెరుచుకోనున్నాయి. వారికి జూన్ 7న బక్రీద్ సెలవు కలిసిరానుంది. ఈ పండగ సందర్భంగా జూన్ లో మొదటి శనివారం సెలవు వస్తోంది... ఆ తర్వాత ఆదివారం సాధారణ సెలవే. ఇలా వరుసగా రెండ్రోజులు ఇంటర్మీడియట్ విద్యార్థులతో పాటు ఉద్యోగులకు సెలవు వస్తోంది. స్కూల్ విద్యార్థులకు మాత్రం ఇది వేసవి సెలవుల్లో కలిసిపోతుంది.

జూన్ రెండోవారంలో మరోసారి లాంగ్ వీకెండ్ వస్తోంది. వేసవి సెలవులు ముగిసి స్కూళ్లు ప్రారంభంకాగానే ఇలా సెలవులు వస్తాయన్న వార్త విద్యార్థులను ఖుషీ చేయనుంది. జూన్ 12న తెలుగు రాష్ట్రాల్లో స్కూళ్లు తెరుచుకుని రెండ్రోజులు నడుస్తాయో లేదో మరో రెండ్రోజులు సెలవులు వస్తాయి. జూన్ 14న రెండో శనివారం విద్యాసంస్థలకు సెలవు ఉంటుంది. ఇక ఆ తర్వాతిరోజు జూన్ 15 ఆదివారం. ఎలాగూ సాధారణ సెలవు ఉంటుంది. అయితే ఈ ఆదివారం ముస్లింల పర్వదినం ఈద్ ఇ గదీర్ ఉంది... దీంతో తెలంగాణ, ఏపీలో అప్షనల్ హాలిడే ఇచ్చినా ఆదివారంతో కలిసిపోయింది.

ఇక జూన్ 22న ఆదివారం మరో సెలవు వస్తోంది. ఆ తర్వాత జూన్ 27న రథయాత్ర సందర్భంగా ఏపీ, తెలంగాణలో ఐచ్చిక సెలవు ప్రకటించారు. 29న మళ్లీ ఆదివారం సెలవు. అయితే కొన్ని ప్రైవేట్ విద్యాసంస్థలకు శనివారం కూడా సెలవు ఉంటుంది... వారికి జూన్ 28న కూడా సెలవే అన్నమాట. అంటే కొందరు విద్యార్థులకు జూన్ 27, 28, 29 మూడ్రోజులు సెలవు ఉండే అవకాశాలున్నాయి. 

ఇక జూన్ మొదటివారంలోనే నైరుతి రుతుపవనాలు తెలుగు రాష్ట్రాలకు చేరుకుంటాయి. ఇవి ఇరు రాష్ట్రాల్లో విస్తరించడంతో భారీ నుండి అతిభారీ వర్షాలు కురిసే అవకాశాలుంటాయి. ఈ వర్షాలు, వరద పరిస్థితుల కారణంగా కూడా విద్యాసంస్ధలకు సెలవులు వచ్చే అవకాశాలున్నాయి.