Telangana: మద్యం ప్రియులకు బ్యాడ్ న్యూస్.. ఆ రెండు రోజులు దుకాణాలు బంద్...
ఉజ్జయిని మహంకాళి బోనాల సందర్భంగా జులై 13 ఉదయం నుంచి 15 వరకు హైదరాబాద్లో మద్యం షాపులు మూసేయాలని సీపీ సీవీ ఆనంద్ ఆదేశాలు జారీ చేశారు.
మద్యం ప్రియులకు నిరాశ
తెలంగాణ రాష్ట్ర వ్యాప్తంగా ప్రజలు బోనాల వేడుకలకు సిద్ధమవుతుండగా, మరోవైపు మద్యం ప్రియులకు మాత్రం ఈసారి నిరాశ ఎదురవుతోంది. ఉజ్జయిని మహంకాళి బోనాల వేడుకలు సికింద్రాబాద్ ప్రాంతంలో జులై 14వ తేదీన జరగనున్న నేపథ్యంలో, రెండు రోజులు అంటే జులై 13 ఉదయం 6 గంటల నుండి జులై 15 ఉదయం 6 గంటల వరకు మద్యం అమ్మకాలను నిలిపివేయాలని హైదరాబాద్ పోలీస్ కమిషనర్ సీవీ ఆనంద్ అధికారిక ఆదేశాలు జారీ చేశారు.
మద్యం దుకాణాల మూసివేత
ఈ ఆదేశాల ప్రకారం, నగరంలోని సెంట్రల్, నార్త్, ఈస్ట్ జోన్ల పరిధిలో ఉన్న కీలక పోలీస్ స్టేషన్ల పరిధిలో మద్యం దుకాణాలన్నీ మూసివేయాల్సి ఉంటుంది. ముఖ్యంగా గాంధీనగర్, చిలకలగూడ, లాలాగూడ, వారాసిగూడ, బేగంపేట, గోపాలపురం, తుకారంగేట్, మారేడ్పల్లి, మహంకాళి, రామ్గోపాల్పేట, మార్కెట్ పోలీస్ స్టేషన్ పరిధిలో ఉన్న అన్ని మద్యం షాపులు రెండు రోజుల పాటు తాత్కాలికంగా మూతపడతాయి.
బోనాల ఉత్సవాలు
భక్తులు లక్షల సంఖ్యలో బోనాల ఉత్సవానికి హాజరయ్యే నేపథ్యంలో శాంతిభద్రతలు కాపాడటమే ఈ నిర్ణయానికి ముఖ్య కారణం. ముఖ్యంగా ఉజ్జయిని మహంకాళి ఆలయంలో జరిగే భవిష్య వాణి కార్యక్రమం ఈ పండుగలో అతి ముఖ్యమైన ఘట్టంగా పరిగణించబడుతుంది. భక్తుల నమ్మకానికి అనుగుణంగా మాతంగి రూపంలో అమ్మవారు స్వర్ణలత పచ్చికుండ మీద నిల్చొని భవిష్యత్తు చెబుతారని విశ్వాసం ఉంది. ఈ సందర్భంలో ఎటువంటి అవాంఛనీయ ఘటనలు జరగకుండా ఉండేందుకు పోలీసులు ముందస్తుగా చర్యలు చేపట్టారు.
ఉజ్జయిని మహంకాళి ఆలయాల్లో
హైదరాబాద్ నగరంలో బోనాల ఉత్సవాలు సుమారు నెల రోజులపాటు కొనసాగుతాయి. గోల్కొండ, లాల్ దర్వాజ, ఉజ్జయిని మహంకాళి ఆలయాల్లో జరిగే వేడుకలు అత్యంత ప్రతిష్ఠాత్మకంగా నిర్వహిస్తారు. అందుకే పోలీస్ శాఖ ఇప్పటికే బందోబస్తును కట్టుదిట్టంగా నిర్వహించేందుకు ఏర్పాట్లు పూర్తి చేసింది. నాలుగు రోజుల క్రితమే ప్రత్యేక గస్తీలు మొదలుపెట్టారు. ట్రాఫిక్ నియంత్రణ, క్యూలైన్లు, భక్తుల రద్దీ నియంత్రణ, డ్రోన్ల ద్వారా నిఘా వంటి అంశాల్లో అధికారులు పూర్తి స్థాయిలో చురుగ్గా ఉన్నారు.
విదేశాల నుండి కూడా...
ఈ ఏడాది బోనాల వేడుకలకు విదేశాల నుండి కూడా భక్తులు పెద్ద సంఖ్యలో రావడం ఖాయంగా కనిపిస్తోంది. అందుకే అధికారులు భద్రత చర్యలు మరింత కఠినంగా తీసుకుంటున్నారు. హైదరాబాద్ నగరం మాత్రమే కాకుండా మేడ్చల్, రంగారెడ్డి జిల్లాల నుండి కూడా భక్తులు తరలిరానున్న నేపథ్యంలో ట్రాఫిక్ డైవర్షన్లు అమల్లోకి వస్తాయి. ఈ మేరకు ట్రాఫిక్ పోలీస్ శాఖ ప్రత్యేక మార్గదర్శకాలు జారీ చేయనుంది
కమిషనర్ ఆదేశాలు
మద్యం షాపుల మూత విషయంలో, హైదరాబాద్ వ్యాప్తంగా ఉన్న మద్యం దుకాణాల యజమానులు పోలీస్ కమిషనర్ ఆదేశాలను తప్పనిసరిగా పాటించాల్సి ఉంటుంది. ఆదేశాలకు వ్యతిరేకంగా వ్యవహరిస్తే, లైసెన్స్ రద్దు సహా కఠిన చర్యలు తీసుకుంటామని అధికారులు స్పష్టం చేశారు.
10,000 మంది పోలీసులను
బోనాల సందర్భంగా ఆలయాల చుట్టూ బందోబస్తు కోసం అదనంగా పోలీసు సిబ్బందిని నియమించారు. సికింద్రాబాద్లో మాత్రమే దాదాపు 10,000 మంది పోలీసులను రంగంలోకి దించనున్నారు. సీసీ కెమెరాలు, డ్రోన్ల ద్వారా నిఘా పెంచి భద్రతను పటిష్టం చేయనున్నారు. ఎటువంటి అవాంఛనీయ సంఘటనలు జరగకుండా పోలీస్ శాఖ అన్ని విభాగాల సమన్వయంతో ముందస్తు చర్యలు చేపడుతోంది.