Chanakya Niti: చాణక్య నీతి ప్రకారం.. భార్య ప్రేమను ఎప్పుడు పరీక్షించాలో తెలుసా?

ఆచార్య చాణక్యుడు మానవులకు ఉపయోగపడే ఎన్నో జీవిత సత్యాలను బోధించాడు. చాణక్యుడి సలహాలను పాటిస్తే మంచి జీవితాన్ని గడపవచ్చని ఇప్పటికీ చాలామంది నమ్ముతారు. చాణక్య నీతిలో భార్యా భర్తల గురించి చాలా విషయాలను ప్రస్తావించారు. చాణక్యుడి ప్రకారం.. భార్య నిజంగా భర్తను ప్రేమిస్తోందా? లేదా అనేది ఒక సందర్భంలో తెలుసుకోవచ్చట. అది ఎప్పుడో చూద్దాం.

చాణక్యుడి ప్రకారం.. భర్తను దురదృష్టం వెంటాడినప్పుడు లేదా పదే పదే అతను జీవితంలో ఓడిపోయినప్పుడు.. భార్య ప్రేమ బయటపడుతుంది. భర్త అలాంటి పరిస్థితిలో ఉన్నప్పుడు ఆయనకు భార్య తోడుగా నిలబడకపోతే.. ఆమె ప్రేమ నిజమైనది కాదని చాణక్య నీతి చెబుతోంది. ఎవరైతే.. కష్ట సమయంలో కూడా భర్తకు తోడుగా, నీడగా ఉంటారో.. తానున్నాని భరోసానిస్తారో.. వారిదే నిజమైన ప్రేమ అని చాణక్యుడు తన బోధనల్లో వివరించాడు.

చాణక్య నీతి ప్రకారం మంచి సేవకుడిని అతని పని చూసి గుర్తించాలి. పదే పదే చెప్పినా.. తప్పు చేసే సేవకుడిని వెంటనే వదిలించుకోవాలి. ఎందుకంటే అలాంటి సేవకులు యజమానికి నష్టం కలిగిస్తారు. వారి వల్ల ప్రమాదాలు వచ్చే అవకాశం కూడా ఉంటుంది. కాబట్టి అలాంటి వారిని దూరం పెట్టడం మంచిదని చాణక్య నీతి చెబుతోంది. 

జీవితంలో కష్టాలు ఎదురైనప్పుడు కుటుంబ సభ్యులను, బంధువులను పరీక్షించాలి. అలాంటి సమయంలో ఎవరు తోడుగా నిలుస్తారో వారే నిజమైన ఆప్తులు. మిగతా వారంతా అవసరం కోసం.. ప్రేమ నటించేవారేనని చాణక్యుడు తన నీతి సూత్రాల్లో పేర్కొన్నాడు. కష్టాల్లో తోడు ఉండే వారినే నమ్మాలని సూచించాడు.

మంచి మిత్రుడు ఏ సందర్భంలోనైనా మిమ్మల్ని విడిచిపెట్టడు. సంతోషంలోనే కాదు.. కష్టంలో ఎవరు మీకు తోడుగా నిలుస్తారో వారే నిజమైన మిత్రులు. అలాంటి మిత్రులను ఎప్పుడూ దూరం చేసుకోవద్దని చాణక్య నీతి చెబుతోంది.