Chanakya Niti: చాణక్య నీతి ప్రకారం భర్త.. భార్యతో ఈ 4 విషయాల్లో జాగ్రత్తగా ఉండాలి!

ఆచార్య చాణక్యుడి గురించి తెలియని వారుండరు. మానవ జీవితాలకు సంబంధించిన ఎన్నో విషయాలను ఆయన తన నీతి సూత్రాల్లో బోధించాడు. ప్రతి భర్త తన భార్యతో ఎలా జీవించాలో చాణక్యుడు చెబుతాడు. చాణక్య నీతి ప్రకారం భార్యకు సంతోషాన్నివ్వలేని భర్త పేదవాడవుతాడు. ఎందులోనూ విజయం సాధించలేడు.

చాణక్య నీతి ప్రకారం భార్యను కాదని వేరే స్త్రీని ప్రేమించే పురుషుడిని లక్ష్మీదేవి ద్వేషిస్తుంది. డబ్బు, గౌరవం తాత్కాలికం. ఇంట్లో లక్ష్మీదేవిని సంతోషంగా ఉంచడం పురుషుడి బాధ్యత. కాబట్టి భార్య పట్ల ప్రేమగా, నమ్మకంగా ఉండాలని చాణక్య నీతి చెబుతోంది.

పెళ్లైన వ్యక్తికి సోమరితనం మంచిది కాదు. సోమరితనం వీడలేకపోతే ఇంట్లో డబ్బు ఉండదు. లక్ష్మీదేవి ఇంట్లోకి రాదు. సోమరితనం ఉన్నవాళ్లు అప్పులు చేసి కష్టాలు కొని తెచ్చుకుంటారు. దీనివల్ల వారితో పాటు ఇంటిల్లిపాది ఇబ్బందిపడాల్సి వస్తుంది.

దురాశగలవారు భౌతిక సుఖాల కోసం, మానసిక ఆనందం కోసం అన్నింటికీ ఆశపడతారు. ఇతరుల మీద కన్నేస్తారు. లక్ష్మీదేవి వారిపై అసంతృప్తిగా ఉంటుంది. దీనివల్ల వారు త్వరగా పేదవారు అవుతారు.

చాణక్య నీతి ప్రకారం భార్యను అవమానించి... చెడు మాటలతో తిట్టేవారు జీవితంలో ఎప్పుడూ విజయం సాధించలేరు. ఇంటి పెద్దవారిని కూడా గౌరవించరు. పాపంలో భాగస్వాములు అవుతారు. కష్టాలు ఎదుర్కొంటారు.