హ్యాండిచ్చిన అల్లు అర్జున్, రాంచరణ్ తో త్రివిక్రమ్ చర్చలు.. నిజమేనా ?

టాలీవుడ్ టాప్ డైరెక్టర్ త్రివిక్రమ్ శ్రీనివాస్ తదుపరి ప్రాజెక్ట్ పై సస్పెన్స్ కొనసాగుతూనే ఉంది. అల్లు అర్జున్‌తో త్రివిక్రమ్ ప్లాన్ చేసిన సినిమా వాయిదా పడటంతో, త్రివిక్రమ్ తన ఫోకస్‌ను ఇతర ప్రాజెక్టులపైకి మళ్లించారు. అల్లు అర్జున్ తో త్రివిక్రమ్ 500 కోట్ల బడ్జెట్ లో మైథాలజీ బ్యాక్ డ్రాప్ లో ఒక చిత్రాన్ని ప్లాన్ చేశారు. 

కానీ అల్లు అర్జున్ మాత్రం డైరెక్టర్ అట్లీకి ప్రాధాన్యత ఇచ్చారు. దీనితో బన్నీ, త్రివిక్రమ్ చిత్రం వాయిదా పడింది. బన్నీతో మూవీ కోసం త్రివిక్రమ్ మరింత కాలం ఎదురు చూడాల్సి వస్తోంది. త్రివిక్రమ్ ప్రస్తుతం వెంకటేష్‌తో ఓ సినిమాను ఫైనలైజ్ చేస్తున్నట్టువార్తలు వస్తున్నాయి. అయితే దీనిపై కూడా ఎలాంటి అధికారిక సమాచారం లేదు. ఇవన్నీ ఇండస్ట్రీలో జరుగుతున్న ఊహాగానాలే. ఇంతలో త్రివిక్రమ్ గురించి మరో క్రేజీ రూమర్స్ వైరల్ గా మారింది. 

త్వరలో రామ్ చరణ్‌తో త్రివిక్రమ్ కలిసి సినిమా చేసే అవకాశం ఉందని ఇండస్ట్రీ వర్గాలు చెబుతున్నాయి. ప్రస్తుతం రామ్ చరణ్ బుచ్చి బాబు సానా దర్శకత్వంలో “పెద్ది” అనే చిత్రం షూటింగ్‌లో బిజీగా ఉన్నారు. ఈ సినిమా 2025 చివరినాటికి పూర్తి కావాల్సిన టార్గెట్ తో ముందుకెళుతోంది.

అంతేకాకుండా, రామ్ చరణ్ సుకుమార్ దర్శకత్వంలో మరో ప్రాజెక్ట్ కి గ్రీన్ సిగ్నల్ ఇచ్చారు. అయితే “పుష్ప 2” పనులతో బిజీగా ఉన్న సుకుమార్ స్క్రిప్ట్ తయారీలో మరింత సమయం తీసుకోవాలనుకోవడంతో, ఆ ప్రాజెక్ట్ 2026 రెండో భాగంలో మాత్రమే మొదలయ్యే సూచనలు ఉన్నాయి.

ఈ గ్యాప్‌ను ఉపయోగించుకునేందుకు రామ్ చరణ్ మరో ప్రాజెక్ట్ మొదలు పెట్టాలని అనే ఆలోచన లో ఉన్నారు. ఇదే సందర్భంలో పవన్ కల్యాణ్ సూచనపై త్రివిక్రమ్‌తో రామ్ చరణ్ ప్రాథమిక చర్చలు జరిపినట్టు సమాచారం. పవన్ కల్యాణ్, త్రివిక్రమ్ బంధం అందరికీ తెలిసినదే. త్వరలో త్రివిక్రమ్ మరోసారి రామ్ చరణ్ తో మీట్ అయ్యే అవకాశాలు ఉన్నట్లు ఊహాగానాలు వినిపిస్తున్నాయి. చర్చలు ఒక కొలిక్కి వచ్చాక అనౌన్స్మెంట్ ఉండే అవకాశం ఉంది. వీరిద్దరి మధ్య ఎలాంటి కథ గురించి చర్చలు జరుగుతున్నాయి ? అల్లు అర్జున్ తో అనుకున్న కథని త్రివిక్రమ్ రాంచరణ్ తో చేస్తారా ? ఇప్పటికైతే అంతా సస్పెన్సే.