కెనీషా నా జీవిత భాగస్వామి: అఫీషియల్ గా ప్రకటిస్తూ ఆర్తికి రవి మోహన్ కౌంటర్

నటుడు రవి మోహన్ విడుదల చేసిన ప్రకటనలో, “ఇన్నేళ్లుగా నా వెన్నుపోటు పొడిచారు. ఇప్పుడు నా గుండెపై కూడా పొడిచారు. నా కష్టార్జితంతో, పట్టుదలతో నా జీవితాన్ని నేనే నిర్మించుకున్నాను. గత వివాహ జీవితాన్ని ఉపయోగించుకొని చౌకబారు సానుభూతి కోసం ప్రయత్నించడం నేను అంగీకరించను. నా భార్య వల్ల మానసికంగా, శారీరకంగా, భావోద్వేగపరంగా చాలా బాధపడ్డాను.

నేను నా భార్యకు మాత్రమే దూరం కావాలని నిర్ణయించుకున్నాను. నా కొడుకులకు కాదు. నా పిల్లలను వాడుకొని ఆర్థికంగా లబ్ది పొందాలని చూస్తున్నారు. ఆర్తితో నా వైవాహిక జీవితాన్ని కొనసాగించడానికి చాలా ప్రయత్నించాను. ఆమె నన్ను బంగారు బాతులా వాడుకుంది. నన్ను భర్తగా ఆమె ఎప్పుడూ గౌరవించలేదు. నా ఇద్దరు కొడుకులను చూడకుండా నన్ను అడ్డుకుంటున్నారు. 5 సంవత్సరాలుగా నా ఆదాయం అంతా ఆర్తి, ఆమె కుటుంబ సభ్యులకే దక్కింది.

ఇన్నాళ్లు ఓపిక పట్టాను. నా ఓపికకు కూడా ఒక హద్దుంది. నా గాయాలను అర్థం చేసుకోకుండా నా గౌరవాన్ని ప్రశ్నించడం వల్ల నేను మాట్లాడాల్సిన పరిస్థితి ఏర్పడింది. ఇప్పుడు నేను తీసుకున్న నిర్ణయంతో సంతోషంగా ఉన్నాను. నా పిల్లలు నా గర్వం, నా ఆనందం, వారి కోసం ఏదైనా చేస్తాను. కొన్ని రోజులుగా నాకున్న బాధ 16 ఏళ్ల దుఃఖకరమైన జీవితం కంటే పెద్దది కాదు.

నా జీవితంలోకి వెలుగు నింపిన వ్యక్తి కెనీషా. నా ఇంటి నుంచి ఏమీ లేకుండా బయటకు వచ్చినప్పుడు నాకు తోడుగా నిలిచిన వ్యక్తి కెనీషా. ఆమె నా జీవితంలోకి వచ్చిన అందమైన భాగస్వామి. నా జీవితంలో ఎదురైన చట్టపరమైన, భావోద్వేగపరమైన, ఆర్థికపరమైన అన్ని సమస్యల్లోనూ నాకు తోడుగా నిలిచింది. నా కథ విన్న తర్వాత ఒక మానసిక సలహాదారుగానే కాకుండా ఒక స్నేహితురాలిగా కూడా నాకు సహాయం చేసింది” అని రవి మోహన్ ప్రకటనలో పేర్కొన్నారు.