Health Care: పిల్లల ఎముకలు బలంగా మారాలంటే.. రోజూ ఇవి తినిపించాల్సిందే..

ప్రతి ఒక్కరి జీవితంలో బాల్యం చాలా ముఖ్యమైనది. ఈ వయసులో పిల్లలు లేచి నిలబడటం, పరుగెత్తడం, పైకి ఎక్కడం, కింద పడటం వంటి పనులు చేస్తుంటారు. ఈ సమయంలో గాయాలు లేదా ఎముకలు విరగడం వంటి సమస్యలు రావచ్చు. ఎముకలు విరిగితే భవిష్యత్తులో అది  తీవ సమస్యగా మారవచ్చు.  కాబట్టి పిల్లలు ఆరోగ్యంగా ఎదగడానికి, వారికి బలమైన ఎముకలు దృఢంగా మారడానికి తల్లిదండ్రులు బాధ్యత వహించాలి.  పిల్లల ఎముకల ఆరోగ్యాన్ని మెరుగుపరిచే కొన్ని చిట్కాల గురించి తెలుసుకుందాం.  

గుండెను ఆరోగ్యంగా ఉంచడానికి, కండరాలను బలోపేతం చేయడానికి, ఎముకలను అభివృద్ధి చేయడానికి కాల్షియం అవసరం అని తెలుసు కాబట్టి పిల్లల ఆరోగ్యానికి కూడా ప్రతి రోజు వారి డైట్ లో పాలు, పాల ఉత్పత్తులు, ఆకుకూరలు, బాదం, తృణధాన్యాలు వంటివి సూపర్ ఫుడ్ చేర్చాలి. ఒక కప్పు పాలలో 300 మి.గ్రా కాల్షియం, ఒక కప్పు పెరుగులో 400 మి.గ్రా కాల్షియం ఉంటుంది. అలాగే సోయా పాలు, సోయా పెరుగు వంటి సోయాబీన్‌ ఉత్పత్తుల్లో కూడా కాల్షియం పుష్కలంగా ఉంటుంది. 

ఎముకలను ఆరోగ్యానికి  విటమిన్ డి ముఖ్యం. విటమిన్ డి లోపం ఉన్నవారి ఎముకలు చాలా బలహీనంగా ఉంటాయి. శరీరంలో కాల్షియంను గ్రహించే లక్షణం విటమిన్ డి కి ఉంది. గుడ్లు, కొవ్వు చేపలు, పాలు వంటి ఆహార పదార్థాలలో విటమిన్ డి పుష్కలంగా ఉంటుంది. అలాగే.. ఉదయం కొంత సమయం ఎండలో నిలబడితే విటమిన్ డి శరీరానికి అందుతుంది. విటమిన్ డి తక్కువగా ఉంటే వైద్యుడిని సంప్రదించి సప్లిమెంట్స్ తీసుకోండి.  శరీరం కాల్షియంను గ్రహించడానికి విటమిన్ డి చాలా అవసరం. కాబట్టి పిల్లలను ప్రతిరోజూ ఉదయం లేదా సాయంత్రం 15 నిమిషాలు ఎండలో ఆడుకోనివ్వాలి.

ఎముకల పెరుగుదల, బలోపేతానికి ప్రోటీన్లు కూడా చాలా అవసరం. బోన్ హెల్త్ లో ప్రోటీన్లు కీలక పాత్ర పోషిస్తాయి. పప్పులు, బీన్స్, గుడ్లు, చికెన్, చేపలలో ప్రోటీన్లు పుష్కలంగా ఉంటాయి. పిల్లల వయస్సును బట్టి వారికి సరైన మోతాదులో ప్రోటీన్లు ఇవ్వాలి. అలాగే విటమిన్ కె ఎముకల ఆరోగ్యాన్ని నిర్ధారిస్తుంది. బ్రోకలీ, క్యాబేజీ, ఆకుకూరలలో విటమిన్ కె పుష్కలంగా ఉంటుంది. కాల్షియం, విటమిన్ డి, ప్రోటీన్లతో పాటు మెగ్నీషియం, భాస్వరం వంటి ఇతర ఖనిజాలు, విటమిన్లు కూడా ఎముకల పెరుగుదలకు అవసరం. కాబట్టి పిల్లలకు పండ్లు, కూరగాయలు, తృణధాన్యాలు, ప్రోటీన్లు వంటి సమతుల్య ఆహారం అందించాలి.

ఎముకలు ఆరోగ్యంగా ఉండాలంటే ఎక్కువ చక్కెర ఉన్న ఆహారాలను తగ్గించాలి. అలాగే ప్రాసెస్ చేసిన ఆహారాలు,  సోడా పానీయాలు, కెఫిన్ ఉన్న ఆహారాలకు దూరంగా ఉంచండి.  పిల్లలకు సంపూర్ణ ఆహారంతో పాటు శారీరక శ్రమను ఉండాలి. అంటే.. పరుగెత్తడం, దూకడం, ఆడుకోవడం వంటి శారీరక వ్యాయామాలను చేయించండి. ఇవి ఎముకలను బలోపేతం చేయడంతో పాటు ఎముకల సాంద్రతను పెంచుతాయి. 

పిల్లలు ఒకే చోట కూర్చుని ఉండటం వల్ల వారి ఎముకలు, కండరాలు బలహీనపడతాయి. కాబట్టి పిల్లలను ఒకే చోట కూర్చోబెట్టడం, చేతిలో మొబైల్ ఇచ్చి వీడియోలు చూడమనడం వంటి పనులు తగ్గించి, ఇతర కార్యకలాపాలలో పాల్గొనేలా చేయండి.  బాల్యంలో వచ్చే ఎముకల పగుళ్లు భవిష్యత్తులో కూడా సమస్యలను కలిగిస్తాయని వైద్యులు చెబుతున్నారు. కాబట్టి వారు ఆడుకునేటప్పుడు, పరిగెత్తేటప్పుడు జాగ్రత్తగా ఉండటం అవసరం.