బాలకృష్ణ కోసం నాకు అన్యాయం చేశారు, ఎన్టీఆర్ పేరే నా ముందు వినపడడానికి వీల్లేదు..రగిలిపోయిన సీనియర్ హీరో

అప్పట్లో చిత్ర పరిశ్రమలో చాలా మందికి నందమూరి తారక రామారావు అభిమాన నటుడు. ఆయన్ని అందరూ అన్నగారు అని అభిమానంగా పిలిచేవారు. ఎన్టీఆర్ అంటే చాలామంది భయపడేవారు కూడా. అదే సమయంలో కృష్ణ లాంటి హీరోలు ఎన్టీఆర్ ని విభేదించిన సందర్భాలు కూడా ఉన్నాయి. ఎన్టీఆర్ కి వ్యతిరేకంగా సూపర్ స్టార్ కృష్ణ కొన్ని సినిమాలు కూడా చేశారు. అదేవిధంగా ఎన్టీఆర్ ని చంద్రమోహన్ కూడా ఒక సందర్భంలో తీవ్రంగా వ్యతిరేకించారు.

దానికి కారణం ఎన్టీఆర్ తనకు చేసిన అన్యాయమే అని చంద్రమోహన్ ఓ ఇంటర్వ్యూలో తెలిపారు. తప్పు అని తెలిసి కూడా ఎన్టీఆర్ అలా చేయడం తనని బాధించింది అని చంద్రమోహన్ తెలిపారు. ఇంతకీ చంద్రమోహన్ కి, ఎన్టీఆర్ కి మధ్య ఏం జరిగిందో ఇప్పుడు తెలుసుకుందాం. చంద్రమోహన్ ఇంటర్వ్యూలో మాట్లాడుతూ.. 1975లో ఎన్టీఆర్ హీరోగా అన్నదమ్ముల అనుబంధం అనే చిత్రం ఖరారైంది. ఈ చిత్రంలో ఎన్టీఆర్ తమ్ముళ్లుగా మురళీమోహన్, నేను నటించాలి. ముందుగా ఒక సాంగ్ తో ఈ చిత్ర షూటింగ్ ప్రారంభించారు

నేను సాంగ్ షూటింగ్ కోసం రిహార్సల్స్ కూడా చేశాను. మరుసటి రోజు సాంగ్ షూటింగ్ ఉంది. ఉదయాన్నే షూటింగ్ కి వెళ్లాను. షూటింగ్ కి వెళ్ళగానే నాకు ఆశ్చర్యపోయే సంఘటన ఎదురైంది. నాలాగే మేకప్,కాస్ట్యూమ్స్ వేసుకొని ఒక వ్యక్తి కనిపించారు. ఏదో తేడాగా జరుగుతోందని నాకు అనుమానం మొదలైంది. ఎవరా వ్యక్తి నాలాగా మేకప్ వేసుకుని ఉన్నాడు అని అడిగాను. అతను ఎన్టీఆర్ గారి కొడుకు బాలకృష్ణ అని తెలిపారు. నా అనుమానం ఇంకా పెరిగింది.

ఏం జరిగిందని ఎవరిని అడుగుతున్నా సమాధానం చెప్పడం లేదు. కొంతసేపటికి నిర్మాత పితాంబరం నా దగ్గరికి వచ్చి సార్ మీరు ఇంటికి వెళ్లిపోండి సాయంత్రం మీతో నేను మాట్లాడతాను. చిన్న పొరపాటు జరిగింది అని అన్నారు. ఏం జరిగిందో చెప్పండి అని అడిగాను.. లేదు సార్ ఇంటికి వచ్చి నేనే చెబుతాను అని నన్ను పంపించేశారు. ఆరోజు సాయంత్రం పీతాంబరం నా దగ్గరికి వచ్చి పొరపాటు జరిగింది సార్.

ఎన్టీఆర్ గారు తన కొడుకు బాలకృష్ణని తమ్ముడిగా చూడాలి అనుకున్నారు. చివరి నిమిషంలో మీ పాత్ర బాలకృష్ణకు వెళ్ళింది. ఎన్టీఆర్ గారికి నచ్చ చెప్పడానికి మేము చాలా ప్రయత్నించాం. ఈ సినిమాలో బాలకృష్ణని నా తమ్ముడి పాత్రకి తీసుకోండి. చంద్రమోహన్ కి నా మాటగా చెప్పండి.. నా తదుపరి చిత్రంలో చంద్రమోహన్ కి మంచి వేషం ఇస్తాం అని చెప్పండి అని అన్నారు. దీనితో చంద్రమోహన్ కి విపరీతమైన కోపం వచ్చిందట. 

ఒక ఆర్టిస్ట్ ని షూటింగ్ వరకు రప్పించి మేకప్ వేసుకునే ముందు అవమానించడం ఏంటి? ఏదైనా ఉంటే నేను ఇంట్లో ఉన్నప్పుడే చెప్పొచ్చు కదా. షూటింగ్ కి రప్పించి అవమానిస్తారా అని చంద్రమోహన్ మండిపడ్డారు. లేదు సార్ మీకు తర్వాతి చిత్రంలో ఎన్టీఆర్ గారు మంచి వేషం ఇస్తాను అని చెప్పారు. వేషం గీషం  నాకేం అవసరం లేదు.. అసలు ఎన్టీఆర్ గారి పేరే నా ముందు వినపడడానికి వీల్లేదు అంటూ చంద్రమోహన్ ఒక రేంజ్ లో ఫైర్ అయ్యారట. అన్నదమ్ముల అనుబంధం చిత్రం ప్రారంభమయ్యే సమయానికి నాకు టాలీవుడ్ లో ఒక రేంజ్ వచ్చింది.. పాపులారిటీ పెరిగింది.. హీరోగా వరుసగా సినిమాలు చేస్తున్నాను.

అలాంటి నన్ను షూటింగ్ వరకు పిలిపించి అవమానించడంతో జీవించుకోలేకపోయాను అని చంద్రమోహన్ తెలిపారు. ఎన్టీఆర్ గారు చెప్పినట్లు ఆ తర్వాత నాకేమీ ఆయన అవకాశాలు ఇవ్వలేదు. ఆ టైం కి ఏదో ఒక మాట అనేశారు అంతే. ఆయన కొడుకుని తమ్ముడుగా చూడాలనుకోవడం తప్ప ఏమీ లేదు. కాకపోతే ఆ పని ముందే చేసి ఉండాల్సింది. నన్ను షూటింగ్ వరకు రప్పించి అవమానించడమే నాకు బాధ కలిగించింది అని చంద్రమోహన్ అన్నారు.