Shubman Gill: శుభ్‌మన్ గిల్‌ బ్యాక్ టు బ్యాక్ సెంచరీలు.. భారత ప్లేయర్ గా సూపర్ రికార్డు

Shubman Gill : ఇంగ్లాండ్ లో జరుగుతున్న ఐదు టెస్ట్‌ల సిరీస్‌లో భారత కెప్టెన్ శుభ్‌మన్ గిల్‌ అద్భుతమైన ప్రదర్శనతో రికార్డుల మోత మోగిస్తున్నాడు. బ్యాక్ టు బ్యాక్ సెంచరీలతో దుమ్మురేపుతున్నాడు.

వరుసగా రెండు టెస్ట్ మ్యాచుల్లో సెంచరీలు సాధించిన నాలుగో భారత కెప్టెన్‌గా గిల్ నిలిచాడు. ఈ జాబితాలో విజయ్ హజారే, సునీల్ గవాస్కర్, విరాట్ కోహ్లీలు మాత్రమే ఉన్నారు.

సిరీస్‌కు ముందు గిల్ ఫామ్‌పై కొన్ని అనుమానాలు వ్యక్తమయ్యాయి. గతంలో ఇంగ్లాండ్ లో గిల్ బ్యాటింగ్ సగటు కేవలం 14.66 మాత్రమే ఉంది. 2025లో తన మెరుగైన ఆటతీరుతో ఇంగ్లాండ్ లోనూ తన బ్యాట్ పనిచేస్తుందని చూపించాడు. 

ఇప్పుడు ఒక్కో మ్యాచ్‌లో కొత్త రికార్డులు నెలకొల్పుతున్నాడు. తాజాగా ఎడ్జ్‌బాస్టన్‌ టెస్ట్‌లో గిల్ సెంచరీ కొట్టాడు. దీంతో ఇంగ్లాండ్ లో టెస్ట్ కెప్టెన్‌గా అత్యధిక సెంచరీలు సాధించిన భారత ఆటగాళ్ల జాబితాలో చేరాడు.

• 2 – మహమ్మద్ అజహరుద్దీన్

• 2 – విరాట్ కోహ్లీ

• 2 – శుభ్‌మన్ గిల్

అజహరుద్దీన్ రికార్డును గిల్ సమం చేశాడు. గతేడాది ధర్మశాలలో గిల్ సాధించిన సెంచరీతో కలిపి ఇది అతనికి వరుసగా మూడవ టెస్ట్ సెంచరీ కావడం విశేషం.

అంతర్జాతీయ క్రికెట్లో అత్యధిక సెంచరీలు సాధించిన భారత ఆటగాళ్ల జాబితాలో గిల్ మరో అరుదైన ఘనత సాధించాడు. మహేంద్ర సింగ్ ధోని 15 అంతర్జాతీయ సెంచరీల రికార్డును గిల్ అధిగమించాడు.

గిల్ తన 16వ సెంచరీని ఎడ్జ్‌బాస్టన్‌లో సాధించాడు. ప్రతికూల పరిస్థితుల్లో కూడా గిల్ ఇంగ్లాండ్ బౌలింగ్‌ను ధీటుగా ఎదర్కొంటున్నాడు.

ఒకవైపు వికెట్లు పడుతున్నా గిల్ మిడిల్ ఆర్డర్‌ను నిలబెట్టాడు. తొలుత అతను యశస్వి జైస్వాల్‌తో కీలక భాగస్వామ్యం నెలకొల్పగా, జైస్వాల్ 87 పరుగులకు వెనుదిరిగాడు. ఆ తరువాత గిల్, పంత్‌తో కలిసి బ్యాటింగ్‌ను కొనసాగించాడు. పంత్ 23 పరుగులు చేసి ఔటయ్యాడు.

పంత్ ఔటైన తర్వాత, గిల్‌కు జడేజా మద్దతు అందించాడు. జడేజా బ్యాటింగ్ పై విమర్శలు వస్తున్న క్రమంలో గిల్ తో కలిసి మంచి నాక్ ఆడాడు. ఇప్పుడు 41* పరుగులతో క్రీజులో ఉన్నాడు. మొదటి రోజు ఆట ముగిసే సమయానికి గిల్ 114 పరుగులు, జడేజా 41 పరుగులతో క్రీజులో ఉన్నారు. భారత్ 310/5 పరుగులు చేసింది. 

మొదటి టెస్టులో గిల్ 147 పరుగులు చేసినా భారత్ ఐదు వికెట్ల తేడాతో ఓడింది. రెండో టెస్ట్‌లో గిల్ సెంచరీతో బ్యాటింగ్ ను కొనసాగిస్తున్నాడు. భారత జట్టు విజయానికి ముందుండి పోరాడుతున్నాడు. 

అలాగే, వరుసగా రెండు టెస్టుల్లో కెప్టెన్‌గా 50కి పైగా పరుగులు చేసిన ఐదో భారత ఆటగాడిగా గిల్ నిలిచాడు. ఈ జాబితాలో విజయ్ హజారే, సునీల్ గావస్కర్, సౌరవ్ గంగూలీ, విరాట్ కోహ్లీ ఉన్నారు.