IPL 2025: మొదటి రెండు స్థానాల్లో నిలిచేది ఎవరు?

గుజరాత్ టైటాన్స్‌పై చెన్నై సూపర్ కింగ్స్ భారీ విజయం సాధించడంతో ఐపీఎల్ మొదటి క్వాలిఫయర్ అర్హత సాధించే పోటీ మరింత ఉత్కంఠ గా మారింది.

గుజరాత్ టైటాన్స్, పంజాబ్ కింగ్స్, ఆర్‌సీబీ, ముంబై ఈ 4 జట్లకు మొదటి రెండు స్థానాలను దక్కించుకునే అవకాశాలు ఉన్నాయి. పాయింట్ల పట్టికలో టాప్ రెండు జట్లకు రెండు అవకాశాలు లభిస్తాయి. అందుకే ప్రతి జట్టు క్వాలిఫయర్ -1పై దృష్టి పెట్టింది.

ప్రస్తుతం గుజరాత్ టైటాన్స్ 18, పంజాబ్ కింగ్స్ 17, రాయల్ ఛాలెంజర్స్ బెంగళూరు 17, ముంబై ఇండియన్స్ 16 పాయింట్లు కలిగి ఉన్నాయి. గుజరాత్ కు అన్ని మ్యాచ్‌లు ముగిశాయి. అయినప్పటికీ, ఈ 4 జట్లకు మొదటి క్వాలిఫయర్ గా ఆడటానికి సమాన అవకాశం ఉంది.

రజత్ పాటిదార్ నేతృత్వంలోని ఆర్‌సీబీ చివరి మ్యాచ్‌లో లక్నో సూపర్ జెయింట్స్‌పై గెలిస్తే టాప్-2లో స్థానం సంపాదించడం ఖాయం. ఓడిపోతే 3 లేదా 4వ స్థానంలో ఎలిమినేటర్ ఆడాల్సి ఉంటుంది.

ముంబై ఇండియన్స్ - పంజాబ్ కింగ్స్ మధ్య జరిగే మ్యాచ్‌లో గెలిచిన జట్టు క్వాలిఫయర్-1లో ఆడుతుంది. ప్రస్తుతం పంజాబ్ గెలిస్తే 19 పాయింట్లు అవుతాయి. ముంబై గెలిస్తే 18 పాయింట్లు అవుతాయి. నెట్ రన్‌రేట్ బాగుండటంతో మొదటి క్వాలిఫయర్ అర్హత సాధిస్తుంది.

లక్నోపై ఆర్‌సీబీ గెలిచి, ముంబై-పంజాబ్ మ్యాచ్‌లో కూడా ఫలితం వస్తే, గుజరాత్ 3 లేదా 4వ స్థానానికి పడిపోతుంది. ఆర్‌సీబీ ఓడిపోయి, ముంబై-పంజాబ్ మ్యాచ్ వర్షం కారణంగా రద్దయితేనే గుజరాత్ టాప్ 2 స్థానాన్ని నిలుపుకుంటుంది.