PPF: ప్రతీ నెల మీకొచ్చే రూ. 2 వేల పెన్షన్ పక్కన పెడితే.. 6 లక్ష‌లు మీ సొంతం చేసుకోవ‌చ్చు

పబ్లిక్ ప్రావిడెంట్ ఫండ్ ఒక దీర్ఘకాలిక ప్రభుత్వ పొదుపు పథకం. పోస్ట్ ఆఫీస్ లేదా బ్యాంకుల ద్వారా ఈ ఖాతాను ప్రారంభించవచ్చు. ఈ స్కీమ్‌లో పెట్టుబడికి భారత ప్రభుత్వమే భద్రత కల్పిస్తుంది. అందుకే ఇది రిస్క్ లేని పెట్టుబడిగా గుర్తింపు పొందింది. ప్రస్తుతం పీపీఎఫ్ ఖాతాపై 7.1% వార్షిక వడ్డీ లభిస్తోంది. ఈ వడ్డీ పూర్తిగా పన్ను రహితం.

పీపీఎఫ్ స్కీమ్‌కు ఉండే ప్రధాన ఆకర్షణ పన్ను మినహాయింపులు.

* పెట్టుబడి మొత్తం 80C కింద పన్ను మినహాయింపు ఉంటుంది.

* పెట్టుబడిపై వచ్చే వడ్డీపై పన్ను లేదు.

* మెచ్యూరిటీ సమయంలో పొందే మొత్తం కూడా పూర్తిగా పన్ను రహితం. అంటే ఇది EEE (Exempt–Exempt–Exempt) క్యాటగిరీ స్కీమ్.

ఒక‌వేళ మీరు ఈ ప‌థ‌కంలో నెల‌వారీ పెట్టుబ‌డి రూ. 2000 పెట్టార‌నుకుందాం. దీంతో వార్షిక పెట్టుబడి రూ.24,000 అవుతుంది. పెట్టుబడి కాలం 15 సంవత్సరాలు ఉంటుంది. దీంతో మీరు పెట్టిన మొత్తం పెట్టుబ‌డి రూ. 3,60,000 అవుతుంది. ప్రస్తుతం ఈ ప‌థ‌కంలో 7.1% వడ్డీ ల‌భిస్తుంది. దీంతో 15 ఏళ్ల తర్వాత మీకు సుమారు రూ.6,08,000 మెచ్యూరిటీ మొత్తం లభిస్తుంది. అంటే మీ పెట్టుబడిపై దాదాపు రూ.2.48 లక్షల వడ్డీ ఆదాయం పొందినట్టే. చిన్న మొత్తంతో ప్రారంభించినా, క్రమశిక్షణతో కొనసాగిస్తే మంచి నిధి సిద్ధమవుతుంది.

* కనీస పెట్టుబడి: రూ.500 సంవత్సరానికి

* గరిష్ట పెట్టుబడి: రూ.1.5 లక్షలు సంవత్సరానికి

* లాక్-ఇన్ కాలం: 15 సంవత్సరాలు

* 15 ఏళ్ల తర్వాత ఖాతాను ప్రతి 5 సంవత్సరాలకు పొడిగించుకునే అవకాశం

* 5వ సంవత్సరం తర్వాత పాక్షిక ఉపసంహరణ సదుపాయం

* 3వ సంవత్సరం నుంచి రుణ సౌకర్యం కూడా లభిస్తుంది

భవిష్యత్తు కోసం భద్రమైన పొదుపు కోరుకునేవారు, పన్ను భారం తగ్గించుకోవాలనుకునేవారు, రిస్క్ తీసుకోకుండా దీర్ఘకాల పెట్టుబడి చేయాలనుకునేవారు, జీతం తీసుకునే ఉద్యోగులు, స్వయం ఉపాధి పొందే వారికి ఈ ప‌థ‌కం మంచి ఆప్ష‌న్‌గా చెప్పొచ్చు. చిన్న మొత్తంతో మొదలుపెట్టి, నెమ్మదిగా లక్షల రూపాయల నిధిని సృష్టించాలంటే పీపీఎఫ్ మంచి ఎంపిక.

గమనిక: ఇక్కడ ఇచ్చిన వడ్డీ రేట్లు ప్రస్తుతం అమల్లో ఉన్న సమాచారాన్ని ఆధారంగా తీసుకుని వివరించాం. వడ్డీ రేట్లు కాలానుగుణంగా మారే అవకాశం ఉంటుంది. పెట్టుబడి నిర్ణయాలకు ముందు అధికారిక సమాచారం పరిశీలించాలి.