Lipstick Effect: లిప్‌స్టిక్ అమ్మ‌కాలు పెర‌గ‌డానికి, రెసిషన్‌కు సంబంధం ఏంటి.?

లిప్‌స్టిక్ ఎఫెక్ట్ (Lipstick Effect) అనేది ఒక ఆర్థిక సిద్ధాంతం. దీని ప్రకారం, ఆర్థిక మాంద్యం లేదా కష్టకాలం వచ్చినప్పుడు ప్రజలు పెద్ద ఖర్చులు తగ్గిస్తారు కానీ చిన్న సౌందర్య ఉత్పత్తులు, ముఖ్యంగా లిప్‌స్టిక్ లేదా ఇలాంటి తక్కువ ఖరీదైన విలాస వస్తువులపై ఖర్చు పెంచుతారు. కారణం ఈ చిన్న వస్తువులు తక్కువ ఖర్చుతోనూ వ్యక్తిగత ఆనందాన్ని, మానసిక సంతృప్తిని అందించ‌డ‌మే.

అమెరికాలో 1930ల మహా మాంద్యం (Great Depression), 2001 డాట్ కామ్ బ‌బుల్, 2008 ఆర్థిక సంక్షోభం, అలాగే 2020 కరోనా లాక్‌డౌన్ సమయంలో కూడా లిప్‌స్టిక్ ఎఫెక్ట్ కనిపించింది. పెద్ద ఖరీదైన వస్తువులు కార్లు, ఇళ్లు, విలాసవంతమైన ఫ్యాషన్ వస్తువుల అమ్మకాలు తగ్గినా, లిప్‌స్టిక్‌లు, చిన్న సౌందర్య ఉత్పత్తులు అమ్మకాలు పెరిగాయి. మానసిక శాస్త్రజ్ఞుల ప్రకారం, కష్టాల్లో ఉన్నప్పుడు ప్రజలు “తక్కువ ఖర్చుతో అందం” (Affordable Luxury) వైపు మొగ్గు చూపుతారు.

మానసిక ఉపశమనం: కష్ట సమయంలో సౌందర్య ఉత్పత్తులు ఉపయోగించడం ద్వారా సంతోషం కలుగుతుంది.

తక్కువ ఖర్చు – ఎక్కువ ప్రభావం: చిన్న విలాస వస్తువు తక్కువ ఖర్చుతోనూ వ్యక్తికి ప్రత్యేకమైన అనుభూతిని ఇస్తుంది.

ఆత్మవిశ్వాసం: సంక్షోభ సమయంలో కూడా సొంత రూపాన్ని మెరుగుపరచుకోవడం ద్వారా ఆత్మవిశ్వాసం పెరుగుతుంది.

2001 (9/11 తర్వాత): అమెరికాలో పెద్ద మొత్తంలో విమానయాన, ప్రయాణ పరిశ్రమ దెబ్బతిన్నా లిప్‌స్టిక్ అమ్మకాలు పెరిగాయి.

2008 ఆర్థిక సంక్షోభం: లగ్జరీ హ్యాండ్‌బ్యాగ్‌లు అమ్మకాలు పడిపోగా లిప్‌స్టిక్ సేల్స్ 11% పెరిగాయి.

2020 కరోనా కాలం: ముఖానికి మాస్క్‌లు వేసుకున్నా, Zoom కాల్స్ వల్ల లిప్‌స్టిక్ అమ్మకాలు తగ్గినా, ఇతర చిన్న సౌందర్య ఉత్పత్తులు (నెయిల్‌పాలిష్, స్కిన్‌కేర్) ఎక్కువగా అమ్ముడయ్యాయి

కొన్ని రిపోర్టుల ప్రకారం ప్ర‌స్తుతం అమెరికాలో లిప్‌స్టిక్, నెయిల్‌పాలిష్, తక్కువ ఖర్చు గల కాస్మెటిక్ ఉత్పత్తుల అమ్మకాలు పెరుగుతున్నాయి. పెద్ద ఖర్చు పెట్టే షాపింగ్ తగ్గినప్పటికీ, ఇలాంటి చిన్న విలాసాలు ప్రజలకు మానసిక సాంత్వన ఇస్తున్నాయి.

లిప్‌స్టిక్ దేశ ఆర్థిక పరిస్థితి, వినియోగదారుల మానసికతను అర్థం చేసుకునే సూచికగా చెబుతుంటారు. మార్కెట్ విశ్లేషకులు దీన్ని “మాంద్యం సూచిక” (Recession Indicator)గా కూడా పరిగణిస్తారు.