Royal Enfield: అమ్మకాల్లో దూసుకుపోయిన రాయల్ ఎన్‌ఫీల్డ్ హంటర్ 350: యూత్ ఎగబడి కొంటున్నారు

రాయల్ ఎన్‌ఫీల్డ్ బైకులు భారతదేశంలో బాగా ప్రాచుర్యం పొందాయి. 2025 ఏప్రిల్ నెల రాయల్ ఎన్‌ఫీల్డ్ కి కాస్త నిరాశనే మిగిల్చింది. ఎందుకంటే మార్చి నెల కంటే అమ్మకాలు 13.68% తగ్గాయి. అయితే గత ఏడాది ఏప్రిల్ తో పోలిస్తే 1.28% వృద్ధిని నమోదు చేసింది. ఏప్రిల్ లో 76,002 వాహనాలు అమ్ముడయ్యాయి. మార్చిలో 88,050 వాహనాలు అమ్ముడైన దానికంటే ఇది తక్కువే. 

అయితే కొన్ని మోడల్స్ ఎప్పుడూ అమ్మకాల్లో ముందుంటాయి. అలా బాగా అమ్ముడైన ఒక బైక్ ఉంది. అదే హంటర్. రాయల్ ఎన్‌ఫీల్డ్ కంపెనీ అత్యంత చవకైన బైక్ కూడా ఇదే. 2022లో విడుదలైన హంటర్ యువతను ఆకట్టుకోవడమే లక్ష్యంగా మార్కెట్ లోకి వచ్చింది. విడుదలైనప్పటి నుండి మంచి డిమాండ్ తో అమ్ముడవుతూ ఉంది. రాయల్ ఎన్‌ఫీల్డ్ అత్యంత చవకైన మోటార్ సైకిల్ హంటర్ 350. దీని ఎక్స్ షోరూమ్ ధర రూ.1.50 లక్షల నుండి ప్రారంభమవుతుంది.

ఏప్రిల్‌లో 18,109 హంటర్లు అమ్ముడయ్యాయి. మార్చిలో 16,958 అమ్మకాలతో పోలిస్తే 6.7% ఎక్కువ. 2024 ఏప్రిల్‌లో అమ్ముడైన 16,186 కంటే 11.8% ఎక్కువే. రెండవ అత్యధికంగా అమ్ముడైన బైక్ హంటర్ గా రికార్డుల్లో నిలిచింది. 

రాయల్ ఎన్‌ఫీల్డ్ లో అత్యంత ప్రజాదరణ పొందిన బైక్ క్లాసిక్. కంపెనీ అత్యధికంగా అమ్ముడైన బైక్ కూడా ఇదే. ఏప్రిల్‌లో 26,801 యూనిట్లు అమ్ముడయ్యాయి. కానీ నెలవారీ అమ్మకాల్లో 9% కంటే ఎక్కువ తగ్గుదల కనిపించింది.

రాయల్ ఎన్‌ఫీల్డ్ క్లాసిక్ 2025 మార్చిలో 33,115 యూనిట్లు అమ్ముడయ్యాయి. అయితే వార్షిక అమ్మకాల్లో 29.82% వృద్ధిని నమోదు చేసింది. 

రాయల్ ఎన్‌ఫీల్డ్ పాత మోడల్ బుల్లెట్ 350, గత నెల 16,489 యూనిట్లు అమ్ముడై 25% వార్షిక వృద్ధిని సాధించింది. మార్చిలో 21,987 యూనిట్లు అమ్ముడైన దానికంటే ఇది 25% తక్కువ. 

రాయల్ ఎన్‌ఫీల్డ్ రెండవ చవకైన మోటార్ సైకిల్ బుల్లెట్ 350. దీని ఎక్స్-షోరూమ్ ధర రూ.1.75 లక్షలు.

ప్రస్తుతం యూత్ ని ఎట్రాక్ట్ చేస్తున్న రాయల్ ఎన్‌ఫీల్డ్ బైకులు త్వరలో ఎలక్ట్రిక్ వెర్షన్ లోనూ మార్కెట్ లోకి రానున్నాయి. ఇప్పటికే ఎక్స్ పోలో కొన్ని మోడల్స్ ప్రదర్శించారు.